جريدة القرار الدولية جريدة دولية تصدر في بغداد وتوزع في العالم العربي
مقالات مشابهة
حققت النجمة درة رد فعل كبيرا من خلال مشاركتها في مسلسل علي كلاي، وتقديمها شخصية ميادة، والتي تفاعل معاها عدد كبير من الجمهور سواء على السوشيال ميديا أو مشاهدي التليفزيون.
وقالت درة في تصريح تابعته (القرار): قررت أقدم دور شعبي جديد في علي كلاي، أنا بحب الأدوار دي لأنها بتعلم مع الناس، وميادة جذبتني جدًا وحتى لو الشخصية شريرة بعتمد إني أبني ليها تاريخ.
وأضافت: ميادة كان عندها أزمة نفسية وهي أنها نفسها الراجل اللي حبها يعيش معاها، ولما أمها ماتت واجهت صدمة تانية لأنها كانت هى الداعمة ليها طول الوقت، وعلشان كده قررت الانتقام، وكره الناس لميادة بيدل على نجاح الشخصية. وعن تخوفها من التواجد في مسلسل يجمع أكثر من بطلة قالت: في البداية كنت متخوفة من المشاركة في مسلسل علي كلاي، لأن كل الأعمال اللي بعملها بتكون بطلة أمام بطولة أوبطلة وأمامها بطل، ولكن الموضوع بيختلف على حسب كل عمل، ومسلسل علي كلاي متقسم بطلة أولى وبطلة ثانية وناس جديدة وناس صاعدة ودي طبيعة القصة عندنا، وده كان موجود في مسلسلات زمان زي ليالي الحلمية وحسن أرابيسك وغيرها.
وأضافت: أنا بحب أبص في ورقتي وبحاول أكون متميزة في الشخصية اللي بعملها وتكون مختلفة، وبحب أسيب بصمة في كل الأدوار اللي قدمتها، والمهم عندي إني أكون واخدة مكانتي الصح واللي أستحقها وأتمنى التوفيق للجميع خصوصًا وإحنا معانا فنانين من العيار الثقيل زي انتصار.
وعن تقديمها مسلسلين في رمضان الحالي قالت: إثبات نسب نجح وحقق رد فعل كبير وأشاد به النقاد والجمهور، ولكن الطبيعي إن علي كلاي هو اللي يحقق أعلى نسبة مشاهدة.
وعن تعاونها مع أكثر من بطل شعبي في أعمال سابقة قالت: اشتغلت مع نجوم كبار قدموا أعمال شعبية زي مصطفى شعبان، قدمت معاه أكثر من عمل، ومحمد رمضان اللي بيقول إنه ليه بصمة كبيرة في الأعمال الشعبية وكاريزما، وعمرو سعد قدمت معاه الأجهر وفيلم مولانا وهو ممثل متميز، والسنة دي مع العوضي اللي بعتبره أنه نجم كبير في الدراما الشعبية، وسعيدة بالشغل معاه وبحاول أعمل في كل دور بصمة جديدة.
وعن صراع الـ نمبر وان قالت: أنا لا أشغل نفسي بمسأله مين اللي نمبر وان، والساحة الفنية تتيح التميز لأكثر من شخص، وكل نجم ليه محبينه وكل نجمة ليها اللي جمهورها اللي بيحبها، وأنا مبفكرش في موضوع الأعلى والأكثر مشاهدة، والجمهور بيبقى عارف مين النجم الحقيقي، والعمل الحلو هو اللي بيعيش وطبيعي يكون فيه منافسة زي أي مجال آخر، ومش وظيفة النجم إنه يشوف الإحصائيات لأن دي شغلانه ناس تانية والأهم يكون في إبداع، ولازم كلنا نشتغل على نفسنا، واللي بيحبك هيشوفك أنت رقم واحد، وممكن تبقى أنت أحسن حاجة، وأهم حاجة الستر وحب الناس.
